SENSA YA WATU NA MAKAZI NI MUHIMU KATIKA MIPANGO YA MAENDELEO - “JIANDAE KUHESABIWA 26 AGOSTI 2012”

Serikali ya Jamhuri ya Muungano wa Tanzania ilipitisha Sera ya Taifa ya Idadi ya Watu mwaka 1992. Tangu wakati huo, maendeleo mapya yamekuwa yakitokea kitaifa na kimataifa ambayo yana athari ya moja kwa moja kwenye masuala ya Idadi ya Watu na Maendeleo. Hii imefanya serikali ipitie upya Sera ya Taifa ya Idadi ya Watu ili kujumuisha maendeleo hayo mapya.

Ndani ya nchi, uchumi umebadilika sana kutoka ule uliokuwa ukipangwa na serikali kuu kuwa uchumi wa soko unaozidi kutawaliwa na sekta binafsi, ambayo ina dhima kubwa katika masuala ya idadi ya watu na maendeleo. Zaidi ya hayo, mnamo Juni 1999, serikali ilizindua dira mpya ya maendeleo, yaani, Dira ya Taifa ya Maendeleo 2025. Sera hii iliyodurusiwa, yaani Sera ya Taifa ya Idadi ya Watu ya mwaka 2006 ina lengo la kuratibu na kuhusisha sera, mikakati na programu nyingine ili kuhakikisha maendeleo endelevu ya watu na kukuza usawa wa kijinsia na uwezeshaji wa wanawake. Itatekelezwa kwa mkabala jumuishi wa sekta mbalimbali kwa upana zaidi. Aidha,

Serikali itashirikiana na Asasi Zisizo za Serikali (AZISE), sekta binafsi, jumuiya na mawakala wengine wanaotekeleza sera. Kwa hakika, watu binafsi, vyama vya siasa na makundi mengine katika vyama vya kiraia vinatarajiwa kuwa na dhima ya kuhakikisha kufikiwa kwa malengo na madhumuni ya sera. Madhumuni makuu ya dira ya maendeleo ya nchi ni kuwaondoa Watanzania kutoka kwenye umaskini na kuinua ubora wa maisha ya watu. Kwa hiyo, Sera inatoa miongozo ya kushughulikia masuala ya idadi ya watu kwa namna jumuishi.

Hivyo, inatambua mahusiano baina ya mienendo ya idadi ya watu na ubora wa maisha kwa upande mmoja na ulinzi wa mazingira na maendeleo endelevu kwa upande mwingine. Utekelezaji wake utatoa upeo mpya kwa programu za maendeleo kwa kuhakikisha kwamba masuala ya idadi ya watu yanashughulikiwa kikamilifu. Ni matumaini yangu kwamba, kwa kuungwa mkono na kwa ushiriki kamilifu wa watu, utekelezaji wa sera hii utafanikiwa.

Historia ya Sensa Tanzania.

Sensa ya kwanza Tanzania ilifanyika mwaka 1910. Sensa nne za Mwisho zilifanyika baada ya Uhuru, katika miaka ya 1967, 1978, 1988 na 2002. Kulingana na sensa ya mwisho iliyofanyika mwezi Agosti 2002, idadi ya watu nchini Tanzania ilikuwa 34,443,603.

MATOKEO YA SENSA YA WATU 1967-2002 NA MAKADIRIO KATI YA MWAKA 2003-2025 1967-2002 NA MAKADIRIO KATI YA MWAKA

MWAKA            IDADI                 

1967                      12,313,469

1978                      17,512,610

1988                      23,095,885

2002                     34,443,603

IDADI YA KUANZIA MWAKA 2003-2025 MAKISIO

2003                      34,859,582

2004                     35,944,015

2005                     37,083,346

2006                     38,250,927

2009                     41,915,880

2010                      43,187,823

2012                      45,798,475

2015                      49,861,768

2020                     57,102,896

2025                     65,337,918

Maswali yaulizwayo mara kwa mara (Frequently Asked Questions)

Sensa ya Watu na Makazi ni nini?

Jibu la Swali hili-Sensa ya Watu na Makazi ni utaratibu wa kupata na kurekodi habari kuhusu watu na makazi yao.