WAZIRI WA JK ASHINIKIZWA KUJIUZULU

Na Sitta Tumma, Geita

SAKATA la sheria mpya ya Hifadhi ya Mifuko ya Jamii nchini (SSRA), limeanza kuchukuwa sura mpya, ambapo wafanyakazi wa mgodi wa Geita Gold Mining (GGM), wameicharukia serikali wakiitaka iwatimue Waziri wa Kazi na Ajira, Gaudensia Kabaka na Mkurugenzi wa Mamlaka ya SSRA.

Mbali na kuwataka viongozi hao wajiuzulu pia wafanyakazi hao wameitaka serikali pamoja na Bunge kuhakikisha kipengele cha fao la kujitoa kinaondolewa katika sheria hiyo namba 5 na si vinginevyo. Tamko hilo limetolewa juzi jioni na mwenyekiti wa kamati teule ya kufuatilia na kupinga uundwaji wa sheria hiyo, Deogratias Haule, katika kikao cha pamoja baina ya wafanyakazi hao.

Kwa mujibu wa Haule, kupitishwa kwa sheria na kipengele hicho, kumeonyesha dhahiri kwamba serikali haina nia njema na wananchi wake, hivyo ni vema Waziri Kabaka na Mkurugenzi wa SSRA wakaachia ngazi kwani ndiyo waliohusika kuitunga sheria hiyo kandamizi na dhalimu. “Kulingana na utata wa sheria hii inayoonekana kupora fedha na haki zetu, sisi wafanyakazi wa sekta binafsi hatuna imani tena na Waziri wa Kazi na Ajira pamoja na Mkurugenzi Mkuu wa SSRA, tunawataka wajiuzulu mara moja nyadhifa zao,” alisema.

Kwa makusudi Waziri Kabaka na Mkurugenzi wa SSRA, waliamua kufunika kombe mwanaharamu apite, bila kutafakari kwa kina madhara watakayosababishwa na kipengele cha fao la kujitoa. Kufuatia hali hiyo, wafanyakazi hao wa GGM walihoji uhalali wa sheria hiyo kuanza kutumika haraka haraka bila kuwa na kanuni zake, na kwamba uharaka huo una siri ndani yake.

Haule alihoji pia sababu ya sheria hiyo kutowagusa wabunge, badala yake imetungwa kwa lengo la wafanyakazi wengine, jambo alilodai limeonyesha ubaguzi mkubwa kwani wabunge wanaruhusiwa kupewa mafao yao punde Bunge linapovunjwa na Rais. “Hivyo wafanyakazi walalahoi wanaamini kwamba sheria hii haina nia njema kabisa kwa mstakabali wa maisha yao na vizazi vyao,” alisema. Aidha alitangaza kwamba mbunge yeyote atakayeonekana kushabikia au kupendekeza sheria hiyo iendelee kutumika, wataunganisha nguvu zao kuhakikisha uchaguzi mkuu ujao mbunge huyo hachaguliwi tena.

Chanzo: Tanania Daima