MTIBWA KUJIPIMA NA MGAMBO JKT MKWAKWANI

Na Mbaruku Yusuph, Tanga

MAAFANDE wa Mgambo Shooting watakaoshiriki kwa mara ya kwanza Ligi Kuu ya Bara, kesho watacheza mechi ya kirafiki dhidi ya Mtibwa Sugar, kwenye Uwanja wa Mkwakwani jijini hapa.

Wakati Mgambo wakitarajiwa kucheza kwa mara ya kwanza ligi hiyo iliyopangwa kuanza Septemba 15, Mtibwa chini ya kocha wake Mecky Maxime, ni mabingwa mara mbili 1999 na 2000.

Akizungumza jijini hapa jana, Meneja wa Mgambo Shooting, Dennis Mwingira, alisema maandalizi ya mechi hiyo yanaendelea vizuri na kila kitu kimekamilika.

Mwingira alisema mechi hiyo itakuwa ni maandalizi ya timu hiyo kujiandaa na Ligi Kuu ambapo wataanza kampeni yao dhidi ya Coastal Union ‘Wagosi wa Kaya’ kwenye dimba la Mkwakwani hapo Septemba 15.

Alisema katika mechi hiyo ya ufunguzi watahakikisha wanapambana kufa au kupona kuchukua pointi tatu kutoka kwa Coastal Union.

Mwingira alisema wanasikitishwa na majeruhi waliyokuwa nao, ambao wametokana na michuano ya Majeshi iliyojulikana kama ‘Sita bora teule’ iliyofanyika Kibaha mkoani Pwani, ingawaje watajipanga kukabiliana na hali hiyo.

Chanzo: Tanzania Daima