TANGA WAMUUNGA MKONO MUFTI

Na.  Mbaruku Yusuph, Tanga

BARAZA Kuu la Waislamu Tanzania (BAKWATA), Mkoa wa Tanga limemuunga mkono Sheikh Mkuu wa Tanzania, Mufti Issa bin Shaban Simba kwa kumteua Sheikh Abdallah Mnyasi kuwa Kadhi Mkuu wa Tanzania.

Akizungumza na Tanzania Daima jana, Sheikh wa Mkoa wa Tanga, Ally Juma Luwuchu, alisema uamuzi wa Mufti Simba ulikuwa sahihi, halali na ulizingatia maslahi ya Waislamu wote. Alisema uteuzi wa Sheikh Mnyasi ambaye pia ni Mjumbe wa Baraza Kuu la Ulamaa Bakwata ulitokana na kikao halali cha Tume ya Dini cha masheikh wote wa mikoa na wilaya zake kilichofanyika Juni mwaka huu, mjini Dodoma.

Sheikh Luwuchu alisema Bakwata imekwishatayarisha mfumo wa kisheria utakaokidhi mahitaji ya Waislamu katika kushughulikia kesi za mirathi, ndoa na waqfu. Alisema jukumu lililopo kwa masheikh wote wa mikoa na wilaya zote hapa nchini ni kuunga mkono juhudi zinazofanywa na Mufti Simba kuitisha kikao cha Tume ya Dini na wakati umefka sasa kwa Waislamu kuungana katika kuleta maendeleo ya Uislamu nchini.

Chanzo: Tanzania Daima