MHANDO WA TANESCO AENDA NA MAJI

William Godfrey Mhando

Taarifa iliyotolewa na bodi ya Wakurugenzi Tanesco imesema kutokana na tuhuma mbalimbali za ukiukwaji wa taratibu za shirika ikiwemo matumizi mabaya ya mamlaka, julai 16 2012 bodi iliamua kumsimamisha kazi Mkurugenzi mtendaji Mhandisi William Mhando pamoja na maafisa wengine waandamizi ili kupisha uchunguzi huru na wa haki ili kufahamu ukweli wa tuhuma hizo.

Baada ya hapo ofisi ya mdhibiti na mkaguzi mkuu wa hesabu za mashirika ya Umma ilifanya uchunguzi ili kujua ukweli juu ya tuhuma zilizokua zinamkabili Mhando ambapo katika uchunguzi huo mdhibiti na mkaguzi mkuu wa hesabu za mashirika ya Umma aligundua kuwepo kwa ushahidi dhahiri wa ukiukwaji wa taratibu za shirika na matumizi mabaya ya madaraka dhidi ya Mkurugenzi mtendaji mhandisi William Geofrey Mhando.

Baada ya kupokea ripoti ya mdhibiti na mkaguzi mkuu wa hesabu za mashirika ya Umma, bodi iliteua jopo la watu watatu kusikiliza utetezi wa mhandisi Mhando dhidi ya tuhuma mbalimbali zilizoibuliwa na mdhibiti na mkaguzi mkuu wa hesabu za mashirika ya Umma ambapo baada ya kumsikiliza jopo hilo lilimkuta mhandisi Mhando na hatia ya makosa yanayohusiana na ukiukwaji wa taratibu za shirika ikiwemo mgongano wa kimaslahi.

Pamoja na yote yalioelezwa, tarehe 29 October 2012 bodi ilikutana na kujiridhisha kwamba mhandisi Mhando alifanya makosa yanayohusiana na kuingia kwenye mikataba yenye mgongano wa kimaslahi kinyume na taratibu za shirika ambapo kufatia makosa hayo bodi ya Wakurugenzi imeamua kumwachisha kazi Mhando kuanzia tarehe 29 oktoba 2012.