WADAU WA SOKA ACHENI MAJUNGU RAGE ALISEMA HIVI

Mwenyekiti wa klabu ya soka Simba Alhaji Ismail Aden Rage amesema amesikitishwa na kitendo kilicho fanywa na mahasimu wao katika soka Yanga kwenda kumsajili mlinzi wa Kati wa klabu ya APR ya Rwanda Mbuyi Twite kinyume na taratibu za kisoka.

Akiongea na waandishi wa Habari mjini Dodoma Rage amesema kitendo hicho ni sawa na unyama na si uungwana kwani tayari walikwishamalizana na mchezaji huyo lakini kitendo kilichofanywa na Yanga kwa kushirikiana na  shirikisho la soka nchini Tanzania TFF si uungwana kabisa.

Rage amesema wao kama Simba tayari walimpatia Mbuyi Twite dola elfu 30 kwa mkataba wa miaka miwili na kimsingi walikubaliana naye mbele ya Rais wa klabu ya APR Meja Jenerali Alex Kagame. Lakini wakati Simba wakidhani wameshayamaliza na wakiwa wanamsubiri Mbuyi Twitte kutua Msimbazi ndipo mambo yalipo badilika na taarifa kuifikia Simba kuwa mchezaji huyo amesajiliwa na wapinzani wao Yanga.

Rage amesema kilichofanywa na Yanga wakishirikiana na TFF ni kutumia wakubwa na hasa akimtaja mtoto wa Kigogo ambaye hakuwa tayari kumtaja jina lake ambaye naye aliwatumia wakubwa wa Rwanda kukamilisha usajili wa Mbuyi Twite ambaye kwasasa anawasubiri Yanga ambao wana ratiba ya kwenda kuweka akambi nchini Rwanda.

Rage amesema wakati taarifa hizo zikiwa zimewafikia Simba aliamua kumpigia simu Rais wa APR Meja Jenerali Alex Kagame ambaye alimthibitishia kuwa ni kweli klabu yake ilitoa ruhusa Simba kumchukua Mbuyi na si Yanga lakini kilicho fanyika ni kuwa amepewa maagizo na wakubwa kumsainisha Twite katika klabu ya Yanga na hivyo taratibu za uhamisho zikafanyika ili mchezaji huyo ajiunge na Yanga.

Rage amesema hilo limemsikitisha yeye na uongozi wote wa Simba na kuwataka wanachama na wapenzi wa Simba wawe watulivu kwa mambo hayo yana mwisho. Kwasasa Rage amesema wao kama Simba wamekubali yaishe isipokuwa wanaomba mchezaji huyo kurudisha pesa alizochukua baada ya makubaliano na Simba ikiwa ni pamoja na dola elfu 30,000 za usajili wake, gharama za usafiri wa kwenda Kigali mpaka Lubumbashi na kisha kurejea Dar es salaam na hoteli, pamoja na gharama za kuwalipa mawakili waliosimamia zoezi la usajili wake kisheria ambazo kwa ujumla wake ni kiasi wa dolari za kiamrekani 9,000.

Rage amesema hilo likishindikana watalazimika kupeleka mashtaka shirikisho la soka duniani FIFA kutokana na kitendo cha kitapeli kilichofanywa na mchezaji huyo kujisajili vilabu viwili.